《打機男人的另外選擇》
尋日講到男人打機其實都幾唔錯，女士們應該欣賞，睇留言都見到有部份朋友覺得對伴侶講，呢件都唔係一件好事，咁更應該睇呢一篇續篇，女士們要睇，更要叫埋伴侶一齊睇。
打機的確唔係咩壞事，作為男人我明，打機係一種回憶，一種放鬆，一種交流，一種成功感，試諗下一日繁忙工作之後，我哋想要嘅係休息，打機好在係，有規則，有框架，你努力就會前進，你付出就會有回報，遊戲設計永遠都係令人開心，令人驚喜，令人享受，因為遊戲係為自己服務，係遊戲之中，男人會有種熟悉同安全感。
既然遊戲咁好，咁打機都好正常，但希望男士們打機時都會諗多一樣野。
我諗，每段關係最初開始時，男仔都會放低手制，去摸索一個人，去建立一段關係，而呢個人係你放低手制之時慢慢得到，你知㗎；但你有冇覺得，當你拎起手制時，又會一點一點咁消磨呢段關係？
其實兩個人，唔係非黑即白，唔係一係打一係唔打，所以，唔係要你唔打機，而係，打得多機，有時都會攰同悶，但因為習慣，因為唔想諗，先會繼續玩落去係咪？
男士們，偷偷望下你身邊嘅人，其實除左打機，呢段時間你仲可以同身邊嘅人做乜？
我知我知，同佢做乜，唔係你話乜就乜嘛，女人好麻煩，好難服待，亦好少女人會認同同喜歡男人嘅興趣（有嘅你就好好珍惜喇），通常我哋講乜就會死乜，然後問女人想做乜，佢哋又未必知，講出嚟嘅你又未必有興趣，所以，我明啊，BRO，大家心照。
女人係好麻煩，你知，我知，單眼佬都知，但當你講女人好麻煩時，佢地只會講，咁你唔好鐘意女人囉！係啊，好難搞，女人有時就係會咁講野，係好難聽，係好難頂，但係芸芸眾多女人之中，你揀佢，咁自然有你既原因，我唔知原因係乜，呢個原因可能連你伴侶都唔知，得你自己知，你知，就得啦。
返返正題，一個平凡嘅晚上，未必係特別日子，但我地會唔會可以做到乜？
比起打機，身邊嘅人，真係咁無聊咩？一個曾經令你朝思暮想嘅人，了解咗，穩定咗就全無價值嗎？你知唔係啊，但唔係人人都識浪漫，你或者係一個好悶，好呆嘅人。
試諗吓，兩個人飲杯酒聽吓歌，又或者試下跳舞，雖然你地都未必識，但相擁住，搖下搖下咁，都幾浪漫啊！一齊執下屋，一齊玩拼圖，一齊落樓行逛下等等都可以啊。
你會諗，佢未必想喎！咁你試下用一個好真誠，好想既眼神去說服佢，都係唔得，就係時候展示大男人嘅氣勢！
兩個人一齊，要有私人空間，亦更要有兩個人既時光。
打機，你得到既野，永遠都取代唔到兩個人一齊既時間；而兩個人一齊既時間，亦唔會比到打機帶比你既舒適。
所以從來都唔係做唔做某樣野嘅問題，而係你做呢件事時，係唔係無做到另一樣野，今晚，試試佢啦兄弟！
Search